Borgar Michelsen

Miljøsakene SV ikkje snakkar om

Fleire aviser har i det siste publisert eit lesarinnlegg frå SVs Inga Marte Thorkildsen der ho angriper Venstres miljøengasjement. I overfladisk skuledebattstil hopper Thorkildsen elegant over miljørekneskapen for sitt eige parti for perioden 2005-2009. Kanskje ikkje så rart når ein ser på lista under:

• Opning for oljeleiting ved korallrevet Sularevet
• Nei til grøne sertifikat som ville fått fart på den fornybare energiproduksjonen
• Utsetjing av Ringeriksbana som ville redusert reisetida med tog mellom Bergen og Oslo med 1 time
• Nedlegging av vær- og klimaskipet Polarfront frå 01.01.2010
• Mageplask på Mongstad - ingen rensing frå dag 1!
• Opning av det kontroversielle Goliat-feltet
• Likegyldig til oljesandutvinning med StatoilHydro i Canada
• Stans av CO2-rensing på Kårstø
• Opning for oljeaktivitet utanfor Jan Mayen

Andre som har døme på fleire miljøsvik frå regjeringa dei siste fire åra?

Jens, Jensen og den tredje vegen

Jens Stoltenberg og Siv Jensen har alt å tene på å framstille valet i haust som eit val mellom raudt og blått, Jens eller Jensen. Men begge tek feil. Det er fem moglege regjeringsalternativ dei neste fire åra, og dei to minst sannsynlege alternativa er fleirtalsregjering med frp/h eller mindretalsregjering med frp/h.

Slik kan det gå (tilfeldig rekkefølgje):

1. Fleirtalsregjering mellom AP+SV+SP
Om dagens regjering held fleirtalet vil det ikkje bli noko regjeringsskifte. Om ein ser på målingane etter 2005-valet er det ikkje veldig sannsynleg at dette skjer. Men det kan skje.

2. Mindretalsregjering AP
Om ap/sv/sp ikkje får fleirtal, og AP blir den største mindretalskonstellasjonen på stortinget, er det duka for ei rein ap-regjering med Jens Stoltenberg som statsminister. Ikkje akkurat usannsynleg om ein ser på siste meiningsmålingar.

3. Mindretalsregjering H+Venstre+KrF
Dersom dagens regjering ikkje får fleirtal, og H/Venstre/Krf blir større enn Arbeidarpartiet, blir det desse tre partia som kjem til å danne ny regjering. Har skjedd før, kan fint skje igjen.

4. Fleirtalsregjering Frp+H
Dersom Frp og Høgre får fleirtal saman kan dei ende i regjering saman. Men det vil rett og slett aldri skje. Så enkelt!

5. Mindretalsregjering Frp+H
Det femte alternativet er ikkje berre usannsynleg, det vil heller ikkje vere levedyktig. Ein mindretalsregjering plassert yttarst til høgre på den politiske skalaen vil ha så store problem med å manøvrere seg til fleirtal på stortinget at dei vil måtte gå svært kjapt etter innsetjing. Heldigvis.

Trond Giske vil privatisere politioppgåver

Demokratiets varsellampar bør blinke når kulturminister Trond Giske vil gje private selskap tilgang til å etterforske fildeling.

Simonsen advokatfirma har sidan 31.12. 2007 hatt løyve til å overvake ulovleg fildeling på vegne av plate- og filmbransjen. Dette har skapt sterke reaksjonar, og i går blei det kjent at Datatilsynet ikkje vil forlenge konsesjonen til Simonsen-advokatane. Gleda vart imidlartid kortvarig. For dagen etter gjekk kulturminister Trond Giske ut og bad Datatilsynet gjere om vedtaket sitt, slik at den private fildelingsetterforskinga kan halde fram.

I ein liberal rettsstat er det berre politiet som skal etterforske lovbrot, inkludert ulovleg fildeling! Det er sjokkerande at kulturministeren viser så lite forståing for den prinsipielle kritikken som har blitt reist mot å gje plateselskapa politifullmaktar. Får Giske viljen sin betyr det ikkje mindre enn ein privatisering av politioppgåver. Det er ganske overraskande frå den kanten...

Mindre forsking med Stoltenberg

Regjeringa har dei siste fire åra nedprioritert det viktigaste av alt: forsking!

Siste grelle døme er regjeringas plan for å legge ned vær- og klimastasjonen M i Norskehavet. Denne stasjonen har vore i kontinuerleg drift i 60 år, og forskingsdataa som har blitt samla inn i desse åra er i dag av uvurderleg verdi for forskinga. Kanskje spesielt for klimaforskinga. Tilgang til data som strekker seg over lang tid er avgjerande for å kunne forstå dei endringane som skjer av klimaet på jorda. Å stoppe datainnsamlinga frå 1.januar 2010, slik regjeringa vil, er å kaste 60 års innsamla data over bord.

Det er ikkje berre Venstre som går mot nedlegging av vær- og klimastasjonen M.  Hyppigheten og kontinuiteten av målingar gjer denne stasjonen unik i internasjonal samanheng. Difor har forskarar frå Havforskingsinstituttet, Bjerknessenteret, Universitetet i Bergen, Universitetet i Oslo, NIVA, SINTEF, National Oceanography Centre (Storbritannia) og National Oceanic and Atmospheric Administration (USA) gått saman om eit opprop mot det dei meiner er ei svekking av klimaforskinga.  Saka har og fått omtale fagtidsskriftet Nature.

Dersom vi skal ta klimaendringane på alvor må vi legge til rett for meir forsking, ikkje mindre. Då eg tidlegare i år spurde forskarar i Bergen om det er mogleg og ønskjeleg å få til meir forsking frå vær- og klimastasjon M i norskehavet var svaret eit rungande ja. Mannskapet på stasjonen sa samstundes at dei har kapasitet til å gjere fleire målingar og testar som kan kome framtidig forsking til gode. Dei einaste som er negative til meir forsking er Ap, SV og SP, og enn så lenge er det dei som bestemmer...

Interesserte bør lese kronikken Redd Polarfront!