Borgar Michelsen

Takk til CIA

Norske partileiarar i følgje etterretningsorganisasjonen CIA:

Center Party [Aslaug Marie HAGA]; Christian People's Party [Dagfinn HOYBRATEN]; Coastal Party [Roy WAAGE]; Conservative Party [Erna SOLBERG]; Labor Party [Jens STOLTENBERG]; Liberal Party [Lars Henrick MICHELSEN]; Progress Party [Siv JENSEN]; Red Electoral Alliance [Torstein DAHLE]; Socialist Left Party [Kristin HALVORSEN]

Gå inn på denne linken, vel "Governance" og deretter "Political parties and leader". Tipset ramla inn på Venstre sin elektroniske postkasse i dag.

Håper ingen tipsar verdspolitiet om dette:)

Briste eller bere i Nord-Uganda

Sidan Yoweri Kaguta Museveni kom til makta i Uganda i 1986, har rebellane i Lords Resistance Army (LRA) drive ein bestialsk krigføring i nord. I løpet av dei 20 åra borgarkrigen har vart har 1,6 millionar menneske blitt driven på flukt frå heimane sine. 25.000 - kor av dei fleste er born - har blitt kidnappa. Jan Egeland har kalla konflikten i Nord-Uganda for "ein av verdas største neglisjerte katastrofar". Denne veka kan det bli fred.
 

Året 2000-2001 budde eg i Uganda. Konflikten i nord var 15 år gammal og kritikken mot Museveni som fredsskapar var aukande. Ikkje minst frå folket i nord. Dei meinte Museveni var uinteressert i tryggleiken deira, og viste til dei endelause episodane kor LRA klarte å angripe sivile inne i sjølve flyktningleirane. Museveni trudde lenge han skulle klare å utslette LRA og geriljaleiar Joseph Kony, men det klarte han aldri.

Museveni si tøffe linje vart tidlegare i år (og kanskje noko overraskande) erstatta med tilbod om amnesti til Joseph Kony. ICC likte det naturlegvis ikkje, men tilbodet fekk iallfall nytt liv i fredsprosessen. Forhandlingane om fred skal denne veka inn i ein avsluttande fase i byen Juba i Sør-Sudan, og i følgje avisa East African vil forhandlingane briste eller bere .

Før sluttforhandlingane tek til har LRA sine geriljasoldatar fått beskjed frå Museveni om å gå til ein av to utvalde stadar for å overgje seg. Så langt skal 1.600 ha møtt opp, og det er visstnok langt fleire enn venta. Det må imidlartid understrekast at slike snart-fred-episodar er noko ein har opplevd mange gongar før i Nord-Uganda, og kvar einaste gong har ein fått høyre at "men denne gongen er det annleis". Slik var det og i 2000-2001 då eg budde der.

Men vi må håpe og be. 20 år med krig er meir enn nok. Nord-Uganda fortener fred no!

Eg drar til FN - sjekk videoblogg

Eg er på veg til FN si 61. generalforsamling i New York. I 35 år har Noreg sendt ungdomsdelegatar til generalforsamlinga, og i år er det min tur. Utan samanlikning for øvrig; den aller første ungdomsdelegaten Noreg sendte var Arne Treholt.

I New York skal eg representere Sosialistisk Ungdom, Auf og 69 andre organisasjonar underlagt LNU-paraplyen. Med andre ord ein skikkeleg mølje. Saman med Kathrine Sund frå SAIH skal eg i hovudsak følgje "ungdomssaker" i FN. Det er i realiteten alle saker. Spesielt gler eg meg til debatten om migrasjon i oktober.

Generalforsamlinga starta med generaldebatt 12.september. Det er under denne debatten stats- og regjeringssjefane er med (haha, måtte le av talen til Hugo Chavez for to dagar sidan). Generaldebatten varar ut september. Etter det delar generalforsamlinga seg inn i seks ulike komitear. Desse tek for seg følgjande saksfelt:

1. komité: Nedrustning og internasjonal tryggleik
2. komité: Økonomiske og finansielle spørsmål
3. komité: Sosiale, menneskelege og kulturelle spørsmål
4. komité: Spesielle politiske sakar og avkolonisering
5. komité: Budsjett og administrative saker
6. komité: Juridiske spørsmål

Generalforsamlinga som heilskap er ikkje ferdig før i desember.

Er tilbake i Noreg 11.oktober. Den o-store planen som ungdomsdelegat er å videoblogge opphaldet mitt i FN. Har fått hjelp frå min gode ven Raymond til å sette opp ein ny blogg til føremålet. Så dei neste fjorten dagane er eg å finne på U.N. VLOG.

Talet er 572

572. Dette talet er grunnen til at eg ikkje har hatt overskot til å blogge i det siste. Det har seg nemleg slik at Unge Venstre skal revidere sitt politiske program på landsmøtet 13.-15. oktober. Det er komt inn 572 forslag til endringar. 572!!! Og alle skal røystes over.

Om eg skal tippe så trur eg dei to største debattane blir atomkraftverk i Noreg og legalisering av  narkotika (kor mine standpnkt er nei og ja. kjem tilbake til det seinare). Men som alltid når ein diskuterer politikk så er det ofte dei raraste ting som skapar mest debatt. Det kan vere stemmereglar i EU eller storleiken på maskene i eit fiskeoppdrett. Landsmøter er festlege. Ein er garantert finurlege episodar, fantastiske talar om rare ting og absurde vedtak.

Frå mi tid i Unge Venstre kan eg nemne følgjande landsmøteminner:

Talen om "rusing på matfett i Nord-Noreg".
Debatten om ordet "tufte" skulle stå i prinsipprogrammet.
Forslaget "Ja til dyresex, så  lenge dyret ikkje er så lite at det kan ta skade av det".
Vedtaket "Ja til etisk porno".

Så får vi sjå kva landsmøtet i år kjem fram til.