Borgar Michelsen

Brev frå Erna

Så kom svaret frå Erna Solberg sitt departement:

NEDLEGGING AV VESTLANDSHEIMEN STATLEGE MOTTAK
 
Eg viser til e-post av 21. juni 2005 om nedlegging av Vestlandsheimen statlege mottak.
 
Utlendingsdirektoratet (UDI) har ansvaret for å tilpasse kapasiteten i statlege mottak til behovet for å innkvartere menneske som søkjer asyl i Noreg. For å sikre god utnytting av offentlege midlar, er det i statsbudsjettet stilt krav om ei kapasitetsutnytting på minst 90 prosent av den faste kapasiteten. Direktoratet må til kvar tid tilpasse det totale talet plassar i mottak til dette. Kommunal- og regionaldepartementet har delegert ansvaret for å opprette nye mottak når det er behov for det, og å legge ned mottak når det er nødvendig å nedjustere talet på mottaksplassar, til UDI.
 
Prosessen rundt oppretting og nedlegging av mottak må vere fleksibel, og kunne gjennomførast relativt raskt. Det at mange mottaksplassar blir ståande tomme er ikkje god bruk av offentlege midlar. Som følgje av at talet på asylsøkjarar er redusert den seinare tida er det mindre behov for plassar i asylmottak. UDI la i 2004 ned 37 mottak. Talet på bebuarar i mottak har blitt lågare sida årsskiftet, og det vil derfor vere nødvendig å leggje ned enno fleire asylmottak. Det er på denne bakgrunnen ikkje muleg å unngå at bebuarar i mottak enkelte gonger må flytte til eit anna mottak. I tillegg vil eg understreke at eit tilbod om ein plass i eit statleg mottak er eit mellombels og frivillig butilbod.
 
Drifta ved mange mottak er god, og UDI står overfor vanskelege vurderingar når det skal avgjerast kva for mottak som skal leggjast ned.
 
Nedlegging av Vestlandsheimen skjer i same tempo som andre nedleggingar av mottak.  Det er vanleg å ha ei oppseiingsfrist på 3 månader i kontrakten mellom UDI og driftsoperatør, slik Vestlandsheimen har.
 
Vestlandsheimen mottak har 170 bebuarar. Av disse er 17 einslege mindreårige asylsøkjarar. Det er rundt 70 bebuarar på Vestlandsheimen som er klare for busetting i ein kommune. UDI er i dialog med fleire kommunar, og det blir teke sikte på å få busett desse personane før Vestlandsheimen blir lagt ned. Ved plassering av bebuarar på andre mottak vil det alltid bli teke omsyn til bebuaren sine ønskjer og behov. UDI arbeider for at alle barnefamiliar på Vestlandsheimen skal få flytte til nytt mottak før skulen startar opp att etter sommaren.
 
Av dei 17 busette på avdelinga for einslege mindreårige på Vestlandsheimen er berre 6 under 18 år. Alle dei einslege mindreårige under 18 år vil bli busette på avdelinga for einslege mindreårige på Dale mottak. Ingen av dei einslege mindreårige har flytta før skuleåret var avslutta.
 
UDI har fylgt Barnekonvensjonen artikkel 12 ved å ha individuelle samtaler med alle dei 17 bebuarane som er registrert som einslege mindreårige på Vestlandsheimen.
Fleire har gitt utrykk for at dei ikkje ønskjer å flytte, og at dei vegrar seg for å bu på eit nytt mottak. Barna sine synspunkt skal leggjast vekt på og eg har forståing for synspunkta. Einslege mindreårige under 18 år kan likevel ikkje nekte å flytte til eit anna mottak for einslege mindreårige. Det er UDI som har omsorgsansvar for einslege mindreårige under 18 år, og det er derfor direktoratet sitt ansvar å sørgje for at dei får eit godt tilbod medan dei søkjer asyl i Noreg. UDI har ein tett dialog med personalet på det einskilde mottaket for å leggje til rette for best mulege forhold for den einslege mindreårige på det mottaket vedkomande skal flyttast til. UDI sikrar også at verjene til dei einslege mindreårige er informert om prosessen.
 
Flytting til eit anna mottak betyr ikkje at bebuaren får eit dårlegare tilbod, og eg har full tiltru til at bebuarane ved Vestlandsheimen vil få god oppfølging ved det mottaket dei flytter til. Det er vanskeleg å unngå at enkelte er ueinige i UDI si avgjerd om nedlegging av mottak. Det er likevel ikkje muleg å forsvare økonomisk overfor Stortinget at mange mottaksplassar blir ståande ubrukte. Det er derfor ikkje aktuelt for Kommunal- og regionaldepartementet å endre avgjerda om å legge ned Vestlandsheimen.

Tre parti på autopilot

Kva vil dei eigentleg? Forutan å skru tida tilbake og reversere alt som har blitt gjennomført dei siste fire åra, meiner eg. Så langt går valkampen til Senterpartiet, Sosialistisk Venstreparti og Arbeidarpartiet ut på å snakke som tre ulike robotar om høgredominert regjering, skattelette til dei rike, rasering av velferdsstaten og det som verre er. Det ser ut til å liggje prestisje i det å framstille røynda minst mogleg presist. Ingen sjølvstendige tankar eller refleksjonar, alt går på autopilot. Til og med ungdomsorganisasjonane deira driv slagordkampanje på autopilot. Viss ein i debattar utfordrar dei tre på kva dei vil gjere med mogleg regjeringsmakt etter valet, så stoggar dei opp. Skjønar ikkje spørsmålet. Politikk, hæ? Kva meiner vi eigentleg om politikk, kjære rådgjevar? Så blir det stille.

Nytt Flertall har samla slagordvalkampen til dei tre håpefulle på ein nettstad. På denne sida kan ein mellom anna lese kvifor ein handfull kjende personar vil ha nytt stortingsfleirtal. Kjendispresten Einar Gelius vil til dømes ha nytt fleirtal "som kan sette ideologi og verdier i fokus". Eh, finst det berre eit sett med verdiar, Jon Gelius? (dette synet har jo Krf lenge stått for), og kva ideologi siktar du eigentleg til? Bondeideologien til Senterpartiet? Sosialismen til SV? Sosialdemokratiet til Ap? Det beste på Nytt Flertall er likevel alle nyhendesakene. Innhaldet i desse går kort fortalt ut på følgjande: Situasjonen i Zimbabwe er pinglete i høve til det privatiseringshelvete som samarbeidsregjeringa har stelt i stand.

Valkampen har så vidt starta, men saklegskapsnivået til Ap, SP og SV er horribelt lågt. Eg syns synd på dei. Og så syns eg synd på Åge Aleksandersen som lar seg sitere med at han ynskjer nytt fleirtal, slik at han kan få ”60 milliardar i året til rockpopjazzfolkemusikkteateroperavisesangbildedans!!! Minst!!!!”

Brev til Erna

I dag sendte eg følgjande brev til Erna og KRD:

Spørsmål frå Unge Venstre ang. 60 born på Vestlandsheimen Statlege Mottak

Eg har følgjande spørsmål som eg håpar KRD vil svare på snøggast råd ifm UDI sin stenging av Vestlandsheimen Statlege Mottak : Kvifor blir det ikkje teke meir omsyn til dei 60 borna som bur på mottaket når mottaket skal leggjast ned?

Nedleggjinga vart annonsert av UDI 8.juni 2005, og veka etter hadde dei individuelle samtalar med einslege mindreårige. Mottaket skal stengjast innan 31.august. Mitt første ankepunkt er tempoet i denne prosessen, eller kanskje det er manglande prosess som er problemet? Å få nokre veker på seg til å flytte til eit heilt nytt miljø (dei fleste har fått beskjed om å flytte til Dale) er ikkje nok for eit born som må bryte heilt opp med skule og sosialt nettverk. Eg vil påstå at dersom det hadde vore snakk om "norske" born på ein barneverninstitusjon, så ville det vore ein betydeleg prosess rundt ein slik tvangsflytting.

Eg har i dag snakka med organisasjonen SoHo (Se Oss Hør Oss) og dei meiner borna ikkje blir teke omsyn til i flytteprosessen, trass i samtalane som har funne stad. Deira konklusjon er at ingen av ynskja frå borna på dette møtet vart teken omsyn til i særleg stor grad når det kom til omplassering. Det er laga ein eigen rapport frå desse møta.

Unge Venstre vonar at KRD grip inn, slik at det blir gjeven meir tid. Borna må vidare bli høyrt skikkeleg i denne saka, og ikkje bli overkøyrd. Minner om at Noreg er forplikta av Barnekonvensjonen artikkel 12 som seier, at "Barnet har rett til å si sin mening i alt som vedrører det og barnets meninger skal tillegges vekt".

Når eg får svar skal eg leggje det ut her.

Urfolk sine rettar

SV sin stortingskandidat Olav Gunnar Ballo har i dag sola seg i glansen av Noregsbesøket til tibetanarane sin åndelege leiar Dalai Lama – mannen som i 1989 fekk Nobel sin fredspris for sin kamp for Tibet sitt sjølvstende.

Det er kjempeflott at Ballo er oppteken av tibetanarane sin situasjon i Kina, men Ballo sitt engasjement for urfolk er i dag sterkt avgrensa. Nyleg røysta han imot Finnmarkslova – ei lov som sikrar samar rett til land og vatn i tråd med ILO-konvensjonen om urfolk . Denne konvensjonen ratifiserte Noreg for femten år sidan, men Ballo meiner openbert han ikkje bør gjelde i Noreg. Han trur Finnmarkslova vil føre til ein ”alles kamp mot alle” når rettane til land og vatn skal fordelast. Han seier ikkje eit ord om at samar faktisk har spesielle rettar i eigenskap av å vere eit urfolk. Moralen ser dermed ut til å vere at urfolk er fint og flott, så lenge dei ikkje lever i Noreg.

Amerika, Amerika, Amerika

Organisasjonen Venner av Amerika er verdt ein kjapp liten kommentar. Møtte dei for aller første gang i går ettermiddag i ein debatt om Guantanamo-fangane på Cuba og Donald Rumsfeld sitt besøk i Noreg. Det verka som om VAA-debattanten tok USA-kritikken ganske personleg, han meinte iallfall at ein ikkje kunne kritisere USA for menneskerettsbrot så lenge det eksisterte land som Iran, Nord-Korea, Cuba og Kina. Vidare blei eg fortalt at Unge Venstre støtta islamske fundamentalistar fordi vi hadde invitert Mulla Krekar på eit medlemsmøte for nokre år sidan, og dersom vår politikk hadde blitt gjennomført så hadde Noreg….ja kva var det no igjen…vore ein del av Hitler-Tyskland?

Detaljar, detaljar. Poenget mitt er heilt enkelt, at Venner av Amerika er ein organisasjon som står inne for veldig mykje rart, på same måte som blodkommunistar står for mange snåle ting. Og akkurat som ekstremistane ytst til venstre, så roter Venner av Amerika rundt og rundt i sin eigen propaganda. Sjekk til dømes lenkesamlinga til VAA, og du ser kva eg meiner.

Finst det organiserte Venner av Amerika der ute som meiner eg tek feil av organisasjonen?

Berre ein heilt vanleg tysdag

Hadde eg vore skuleelev i dag så hadde eg sikkert blitt tvungen til å feire 100-årsdagen til unionsoppløysinga. Som elev hadde eg sikkert måtte skrive norskstilar om kor fint det er å vere unionslaus, korleis Christian Michelsen fekk oss fri frå Svenskekongen og korleis det var å vere skuleelev i Noreg i 1905. I dag hadde klassen min sikkert måtte opptre med kongesongen, vaia med norske flagg og høyrt på ein eller annan ordførar som tala om det å vere ein fri og sjølvstendig nasjon .

Men eg er ikkje skuleelev lenger. Og resultatet er at eg ikkje kom på at det var 100-årsdag før eg skrudde på radioen rundt klokka tolv i dag, og fekk servert stortingspresidenten sin lange tale om hendinga forut unionsoppløysinga i 1905. I tillegg fortalte nokon meg at det var militærparade oppover Karl Johan i dag, noko som skurrar litt i hovudet på ein stakkars pasifist. Kvifor viser vi aldri fram sivilarbeidarane våre på dagar som denne?

Det verkar som om det ikkje opptar så alt for mange nordmenn at det er hundre år sidan 1905, bortsett frå stortingspolitikarar, kongefamilien og journalistar. For dei fleste av oss er dagen i dag ein heilt vanleg tysdag. Ein ting har imidertid 7.juni 2005 gjort med meg: Eg har blitt svært gald for å ha kontroll over mi eiga tid, og sympatien min går først og fremst til landets skuleelevar som i dag (og sikkert resten av året) blir tvungen til å meine noko om kongen, unionsoppløysinga og fedrelandet. Slik dei blir det på 17.mai, som var for to veker sidan.

Det er ny tid og behov for å sjå framover. Hundre år utan union får vere nok.